30w啦! 終點在望!

咳左成個月, 終於好番d啦, 雖然仲有2聲咳, 但我諗好快好晒啦!
最近果次係屋企附近睇醫生, 果個醫生依然係開果1種咳水同果1種藥丸, 因為大肚可以食既藥真係好有限, 睇左3個醫生都係開同一種咳水, 無乜效.
醫生都好似無乜辦法咁, 話可能仲要咳下, 天氣好d又可能好d,
所以各位大肚媽媽盡量都唔好比自己病呀, 真係好麻煩架!

呢排我既節目唔係去贊育就係去瑪麗, 一係聽奶粉商bb講座, 真係離唔開bb野!
係贊育醫院我報左產前運動班, 已經上左3堂啦,
頭2堂都係好簡單既產前運動, 其實講理論多過實踐,
1堂2個半鐘教得幾個動作, 都有少少悶架, 比起我上次係私人果度試一堂1個鐘真係私人教既運動多好多.
贊育第3,4,5堂都要老公一齊去既, 第3堂係教用生產球, 算係好玩好多, 不過到時唔知仲記唔記得d動作啦.
如果到時係產房有老公陪住, 就算有無fitball都好好多掛, 起碼有心理上既支持.
第4,5堂仲未上, 不過都好期待, 應該係會教生時點樣用力呼吸, 點樣舒緩.

上上星期六去瑪麗飲糖水, 老公都陪我捱肚餓, 又要等2個鐘, 抽血手臀都瘀左,
今次係第二次飲, 上次飲都無乜問題, 但今次一飲完, 我就出冷汗, 心跳加速, 有點唔舒服, 又唔想話比姑娘知到時要再約再飲過,
後來除左件外套, 又去左個廁所, 再定落黎, 好彩慢慢正常番, 其實果時真係擔心我係咪個心有問題定係有糖尿?

上星期二去瑪麗睇產前檢查, 一度血壓又高左少少, 好在坐左幾個字再度正常番, 上次我度第三次先正常
之後見醫生, 話前幾日飲糖水報告無問題, 放心晒, 我呢個多囊人無事真係好彩!
其他都係度下肚, 聽bb心跳, 無乜特別, 因為我果時仲未去睇心臟科, 所以都無咩做到.

跟住星期四又去瑪麗睇心臟科, 之前都千叮萬囑要準時, 因為醫生一過來睇完就走, 所以我都好早去到.
其實去瑪麗都幾麻煩, 要轉2次車, 早上又怕塞車.
去到內科心臟科, 新症要比$100, 都係磅重, 量血壓, 好彩今次正常唔駛再度過,
阿姐同我驗尿, 佢今次條試紙係5隻色既, 一驗, 佢好奇怪, 話有一樣有3個+, 但佢話好奇怪因為我無糖尿, 同埋我次次產檢應該有驗尿架,
重用第二條同我驗多次都一樣,
我問佢果+++即係乜野問題, 佢又話唔清楚, 叫我問醫生, 我就有少少擔心啦.
阿姐同我做心電圖, 應該係一陣比醫生睇, 做心電圖好快手, 痴左d電線係個心同手腳, 度一分鐘就得.
跟住等醫生出場, 同我一齊等既共有4個孕婦, 原來呢個醫生今次睇完我地4個就走.
見醫生就問下野聽下心跳, 我問醫生係咪都係跳得快, 佢話都係, 問我係咪平時好緊張, 我話唔係呀, 我依家都無返工, 其實我都唔知點解跳得快.
問醫生果+++, 佢問我係咪空腹驗, 我話係, 佢話空肚係正常喎, 乜內科驗尿唔係同產科一樣要空腹驗嗎? 總之佢話正常就得啦.
醫生就叫我去K17D做心臟超聲波, 咁我地4個大肚婆都係一樣等醫生做超聲波,
心臟超聲波都係同平時照肚超聲波差唔多, 都係搽gel照, 醫生睇住個mon, 不過醫生照時無講過野好嚴肅咁,
之後等報告, 好好彩, 醫生話我心瓣厚d, 操作正常, 建議生時要用抗生素之類, 其實我都唔知有幾大問題,
咁我問佢順產有無問題, 佢話無問題, 應該個心都無乜大問題掛, 放心晒, 寫左封信叫我比婦產科

次次係政府度肚, 其實都有點掛住要見bb,
我都約左私家產檢, 29w5d, bb已經有3lbs2oz啦, 馮醫生話胎水正常, 胎盤無前置,
不過小b比胎盤遮住塊面, 醫生好有心機同我個肚搖搖好多次想影張4D相,
終於都影到呢張啦, 識唔識睇呢, 左上係佢塊面仔, 佢前面係胎盤, 口附近有臍帶, 雖然個樣唔係太清楚, 但見到佢安好, size正常都好安心啦!

終於過左30w, 開始入直路啦, 好多bb野都買左啦,
bb床, bb車, 衫仔, 包被, 紗巾等等,  依家仲差消毒煲, 沖涼盤, high chair, 呢d都唔難買.
走佬袋都執得7788啦, 我發覺真係要好大個旅行袋先裝得晒, 淨係m巾尿片濕紙巾都佔好多位
望住呢d洗左既bb衫同包被, 真係覺得好快就會見到bb啦, 好開心

各位孕媽媽同努力緊既姊妹都要努力呀!