37w5d- 瑪麗產檢

好緊張呀, 已經過左37w, bb隨時會出黎, 預產期係8月15日
但心理上好似未準備好呀, 其實好想佢起碼8月先出黎, 我想去埋bb展先呀, 想join打針plan, 同仲有少少野未買好, 如果真係入左院, 就唯有老公一個人去啦!
仲開始擔心陣痛會唔會好辛苦? 會唔會痛好多個鐘? 結果都係唔得要開刀?
不過都唔驚得咁多喇, 希望bb一直都咁聽話無令我辛苦, 生時都唔好令我咁辛苦啦!

今日去完瑪麗產檢, 拿拿臨update下先~
今日無入院照, 在S5婦產科叫我入18號房駁胎心機都係紀錄bb心跳,
我平訓係度個bb心跳好清楚, 但其實側訓舒服d, 點知一側訓就無咁清楚, 就唯有聽bb話打平訓啦
個姑娘都唔知係咪好少駁胎心機, 本來係要測半個鐘,  過左10分鐘果時, 佢入黎望一望又無話乜野,
到20分鐘時入黎, 話奇怪張紀錄紙無乜data, 原來張紙唔夠, 部機都無乜紀錄到,
結果佢話唔好意思, 換過疊紀錄紙又要由頭黎過, 唉! 果時已經中午十二點, 我仲未見醫生, 我知佢地應該趕住一點食飯前攪掂!
唉, 再由頭紀錄過, 平訓又辛苦d, 度到十二點半, 再等見醫生!

見醫生時, 醫生話bb心跳正常無乜野, 但係要再照超聲波睇胎水點樣, 再決定需唔需要預產期前催生,
但係原來照超聲波又要另約日子係贊育照, oh, 原來佢果度無得睇埋架?!
醫生摸肚時, 我問佢頭落左去未? 佢話落左一半啦! 
好緊張呀, 到底幾時會落晒架?
結果下次瑪麗產檢約下星期二, 而贊育超聲波期又要等等, 因為一點鐘食lunch時間約唔到!
咁我唯有係瑪麗食lunch, 再返上去等啦, 食到2點仲要等, 等到3點先拿到贊育超聲波期係下星期一, 要等咁耐真係無奈
不過都好, 星期一照完, 星期二覆診就知點!
希望bb唔好咁心急出黎住, 等我下星期再超聲波見下佢先啦, 我想叫埋媽咪黎一齊睇


奶奶上星期已經黎我度煲薑醋, 我地專登買左個大砂煲,
又專登去買八珍甜醋, 因為人地話甜d 
不過原來超級市場無得賣架, 要去小雜貨店先有, 超級市場只有同珍.
我家不會派太多, 所以暫時只買了一樽十斤裝, 諗住遲d再5斤咁買.
反而奶奶家應該會派很多, 因為我老公係大孫, 佢在大埔應該煲了不少, 哈哈

上2星期連續下雨, 一直無機會洗床單, 一見停雨拿拿臨洗埋bb床野啦!
終於攪掂! 人地話先砌床會早產, 依家都足月, 唔怕啦, 我其實唔係好信, 整好晒d野安樂d, 嘻嘻

36w5d - 瑪麗照胎心機同超聲波

因為上星期產檢話我胎水少, 就約左呢日入瑪麗照清楚, 睇下駛唔駛催生.
老公好好,放假陪我, 約左8點入院, 所以6點就起身預備啦, 真係好耐無試過咁早喇, 6點幾在等車, 結果去到只係7點幾, 仲有時間食個早餐添

食完早餐就去地下入院登記果度交封信同身份證, 佢就比左一堆我名label我, 之後上瑪麗K9S產前房, 最失策係去埋toilet先上去.
雖然唔知駛唔駛, 我好似平時產檢咁帶左早餐前小便, 原來係唔需要既.
上到去, 原來要磅重, 量血壓, 同即時驗尿 , 我岩岩先去完, 唯有飲水再去過, 大家要入院既就記得啦!

因為今日主要係照, 所以唔駛換病人服. 老公無得陪要去出面等, 其實都預左.
訓上病床, 姑娘同我綁2條帶上面有胎心機, 一直紀錄住bb資料,
姑娘比左個三角枕要打側訓, 同埋比左1個制我, 如果我bb有胎動就按呢個制來紀錄,
bb開頭好耐都無郁過, 好似3個字先郁左1下, 姑娘問我, 我話得1下, 佢話少,
之後好彩就多左幾下, 因為唔摸住個肚, 有時好輕微又唔知算唔算係,
跟住陸續多d孕婦同醫生入黎, 有個孕婦訓在我對面床又係同我一樣要紀錄心跳,
不過佢應該係開刀既, 我係對面聽到醫生同佢解釋風險.
有個鬼婆好似有事入院既, 我聽到姑娘用英文問佢問題,
另外有個入左院既, 對住個窗在玩fitball, 可能等度數開, 其他都無乜病人了, 可能在其他房.
訓左係度差唔多1個鐘, 又唔郁得, 真係好無聊, 聽到晒人地講野

跟住我訓訓下, 個胎心機係咁響警報咁喎, 不停"嘟..嘟..嘟", 我都唔知咩事, 我估可能係夠時間要停? 定係我bb有咩事?
有個姑娘埋黎按熄個響聲, 但乜都無講.
之後過多一陣, 部機又"嘟..嘟..嘟", 跟住姑娘又按熄個響聲, 講左句, "BB做乜咁high呀?"
後來我先知原來佢心跳快左就會響, 咁我都無咁驚.
但佢響果時, 都無乜胎動架喎.

響完一輪, 差唔多照左一個鐘, 就完成啦, 跟住等醫生同我照超聲波.
入左一間房照, 個mon得醫生睇到, 我睇唔到,
醫生話都係胎水少, 但bb size同血臍帶流量都正常, 暫時唔駛催生住, 下星期再覆診再要照, 咁我都係聽醫生話點就點啦.
醫生叫我留意胎動, 其實我有時好耐都唔覺佢郁, 都擔心, 咁我問醫生要郁幾多次先算ok, 我話頭先都唔夠10次.
佢話如果靜心打側訓, 2小時郁10次就算ok.
咁可能我有時坐係度無咁靜心唔覺啦.
比完下星期覆診期, 再比埋入院費, 就走得啦, 只係10點幾, 真係早!
不過都好, 唔駛入院住, 其實我都怕照完要入院就帶左1包m巾1包網褲, 依家唔駛用住, 好野!




呢排都係屋企上網同睇書, 無乜出街, 因為都唔行得好耐呀,
係人地blog睇到呢本"騎呢weak7搞大左", 就去圖書館借黎睇, 都幾好睇呀, 我睇到佢生b果度, 真係有點感動呀!

團購就買左呢本"新丁潮爸湊仔奮戰手記", 諗住有時間就睇下, 叫埋老公睇先, 哈哈!

仲有呢2本朋友借我既坐月天書, 希望到時有人煮野我食啦!

仲有呢1本"懷孕奮鬥記", 睇下大家有無興趣?
係我未有bb之前買既, 果時成日睇婦科醫生食藥打排卵針, 都幾失落架,
見到呢本用漫晝講佢地兩公婆為生仔而努力真係好有共鳴, 又好攪笑,
而且我都希望傳d孕氣比你地仲努力緊既blog友!
原價$89, 我賣$45包平郵啦, 希望你地好快生個健康bb!

http://www.kingstone.com.tw/book/book_page.asp?kmcode=2019476478655

http://www.eslite.com/product.aspx?pgid=1001149412149492

 

35w 胎水少左?!

依家踏入35w, 開始覺得少少辛苦, 行街行唔得耐, 行一陣又要抖下,
訓覺一晚去幾次廁所, 訓醒覺又周身骨痛咁, 真係好想快d捱完呀~
好彩既係無腳腫, 我見人地真係腫到唔知點咁.
個身仲有少少痕, 不過臨訓搽下cream就好好多, 我覺得全靠d中藥咋, 我先有覺好訓

星期一同老公去左贊育照超聲波, 姑娘話size正常, bb已經有5磅了
我真係估唔到, 因為之前私家睇果時3磅咋, 我仲諗住佢偏細, 可能要過期居留, 因為佢mon個預產期好似遲多幾日.
bb已經調左頭啦, 不過未落胎盤.
不過姑娘話我胎水少呀, 我都唔知可以點.
咁星期二我就去瑪麗覆診, 講番個報告都係話我胎水少左, 得6.7左右,
我問醫生正常係幾多, 佢話我呢個周數應該要有9-10
但我平時都唔覺得有穿水摻水喎
醫生話有5%既人會係咁, 不過佢話我bb size正常, 血臍帶流量都正常, 唔駛太擔心,
安排我下星期入院再照, 如果再少水, 就可能要催生呀
咁我當然有點擔心啦, 我search過少左胎水有可能會缺氧, 又有可能佢泌尿系統有問題所以先少左水,
我又當然想佢留係我肚越耐越好啦, 不過依家都係唯有聽醫生安排啦!



各位準媽媽, 我有d坐月食譜, 同埋醫院產前運動班notes, 如果你地想要就比個email address我, send比你地丫~

另外我有d 剩餘物資, 唔想浪費, 睇下大家岩唔岩用呀?

1. 7包美素佳兒媽媽奶粉連袋
2. 2包雅培媽媽喜康素
3. 3包安滿孕媽媽奶粉
4. 1包安怡奶粉
全部免費, 但需要付郵費/ 銅鑼灣交收

5. Nature's Mother - Natural Tinted Face Moisturizer 天然孕婦調色日霜 (膚色咁, 面打底用) 60ml
Made in USA

$20包平郵 / 銅鑼灣交收

6. 孕婦裙一條, 偏紫紅色, 後有綁帶, $20包平郵 / 銅鑼灣交收

可email我 snowsnow127@hotmail.com

34w 整裝待發!

昨天好開心同一天收到2樣之前訂比bb既野, 就係Aprica Karoon 3.6kg BB車 同 Medela Swing Maxi 電奶泵.
其實我地一早已經睇定呢架超輕bb車, 不過又有人比左架bb車我地,
所以原本想唔買呢架住, 等佢識坐先買Aprica 2.9kg果架.
不過拿到人地果架, 又重, 又唔可以單手收車, 對於我黎講實在太唔方便啦,
因為我住既地方要上斜路, 同埋要搭架van先出到地鐵站, 我諗真係要成日開車收車, 所以結果都係拍板買呢架3.6kg, 又可以單手收車.
收到架車, 真係好輕身, 好滿意, 雖然人地話太輕可能會反, 但我諗都ok掛, 至緊要自己方便

睇到後面床仔已砌好, 但未執好添, 仲有時間, 嘻嘻.
Medela Swing Maxi 電奶泵結果再減價, 成功叫CS改左£77.76, 即係HK$930左右, 真係好抵.
收到貨, 同HK一樣用三腳插, 唔駛轉, 仲試過換到我買既Pigeon PPSU樽, 真係好, 唔駛再買樽.
希望到時生生性性, 我餵到人奶, 阿b又肯食啦
不過開頭都盡量埋身食架啦, 泵都係需要時用.

另外, 上星期瑪麗產檢, 原來我3次都係一樣咁重, 已經個半月,
我就問下醫生無重過, 會唔會即係阿b都無重架, 有點擔心,
佢話阿b可能吸收左我d營養, 佢見我擔心都安排我下星期係贊育照超聲波,
其實佢就咁摸下就話佢調左頭, 我都要照下先安樂.
好野, 我下星期又可以見阿b啦, 希望佢有正常咁大啦