話咁快, 其實我覺得好耐, bb滿月了, 每日餵奶換片, 真係無數次, 終於都滿月了, 我知道仲有好長日子要捱, 我會好好比心機的! 我地囡囡叫愷欣, 已經拿了出世紙啦, 佢個名係希望佢將來和樂友善同歡欣!!
欣欣b 回到家, 都係久唔久就喊, 成日要我地抱抱, 當有人抱佢或攬住佢就好安樂咁, 你知啦, 通常人地都係話唔好成日抱, 費時寵慣, 但係佢喊到拆天又點捨得由佢? 我覺得佢係未適應呢個世界, 無安全感先喊, 所以我都會照抱, 到佢大d先訓練啦. 人地話用包被, 我覺得都唔work, 可能我地包得唔實, 佢成日都會踢走, 而且包實要換片都唔太方便呢. 好好彩既係佢多數日頭扭計, 夜晚唔係好扭, 我地都有得訓下.
仲有另一樣麻煩既, 係欣欣每一次食奶都唔多, 頭一個月每次食20/30/40/50ml, 所以隔一個鐘又再喊, 又要食過, 有時個個鐘都食, 真係令我地好苦惱, 成日都要餵奶, 真係唔知係咪人奶咁快消化左, 定係因為佢出世都算細粒, 個胃仔細. 到了滿月, 終於都間中食到70-100ml, 雖然係要分段, 即係食左30-50ml左右掃下風換下片再食過, 差唔多3個鐘食一餐, 但今日又再次, 1點食30ml, 2點再食30ml, 真係好無奈, 幾時先可以按照時間表食奶? 其實依家應該至少都3個鐘食一次, 希望延到4個鐘添. 好彩係夜晚有時係4-5個鐘先要食, 快d戒到夜奶就好了.
講番坐月, 其實我有少少後悔無請陪月, 雖然老公都幫好多, 尤其是晚上餵夜奶, 同bb沖涼, 但好多野都自己做番, 我水照濕, 涼照沖, 飯照煮, 又要泵奶, 好似都無乜點休息到,真係幾辛苦.
仲有一樣, 我生bb前咪係腰同大腿都出晒疹既, 點知, 我生完bb第二日就係個肚開始好痕同出疹, 生到成個肚都係, 我真係估唔到生完仲會出, 我諗我d荷爾蒙真係亂晒, 結果我坐月時照出去睇中醫, 食左中藥2星期個肚先無咁痕.
我依家仲有餵人奶, 但主要係泵, 間中埋身, 泵其實我量都唔係好多, 每次泵只係夠佢食一餐, 埋身食其實佢食得好lum, 好鐘意咁, 我都喜歡呢種親蜜既感覺, 但佢通常食一陣就自己甩咀, 遲d又要再食, 好似食極唔夠咁, 我覺得係樽餵岩佢d. 但又要泵又要餵其實都辛苦, 依家得我一個人係屋企湊佢仲麻煩, 因為泵泵下佢喊都唔知繼續泵好定抱佢好, 而且都好累, 我感覺上餵人奶, 個body都好似做運動咁, 泵完個人會累, 試過夜晚做完成日野累到喊, 所以係我餵左1個半月, 我決定逐漸轉飲奶粉啦, 依家一日2餐奶粉, 其他餐人奶, 佢都適應到.
其實睇住初頭由無乜奶, 到儲左呢d奶真係好開心架, 我要放棄做人奶媽了!
- bb係成日都打c egg既, 只好由得佢打, 有時掃下風或飲下水有幫助
- bb都經常打乞次, 不過未必因為凍, 而係因為佢無鼻毛, 所以受到刺激就打乞次
- 打卡介苗既位置(左手臂), 打完之後幾星期會紅腫, 好似小山丘咁, 係正常既
- 初生bb會生粒粒在面上, 係好正常, 叫新生兒暗瘡, 唔係奶癬, 用金銀花水洗下會好d
我地同bb都出過幾次街, bb都幾鐘意出街, 出去反而訓到覺又無咁扭, 街上好多人都鐘意睇bb,讚下幾得意咁, 問下仔定女, 但亦有些人鐘意比下意見, 例如話隻腳仔會凍親, 又話我自己坐月著唔夠衫, 有時都幾無奈呀.
朋友送左個全棉公仔, 同佢做個friend先!
