好想記低你的一點一滴

自從有左呢個秘密之後, 唔可以同人講住, 但我都好想記低你的一點一滴, 好讓我可以重溫你生長的小秘密.
亦好想同各位blog友分享!

上次醫生同我驗HCG, 可是未照, 未寫信比我排政府, 我又好心急, 因為聽聞早去排才有早期唐氏, 唯有去睇普通醫生拿封證明信.
點知我既醫療卡乜都唔包, 次次都話要另比錢, 呢封信盛惠$280

Dec 11, 2012 (5w) (其實果時健康院都唔確定我係5w, 以為6w幾)

呢日係老公放假第一日, 原本老公假期我地打算去旅行架, 依家有了小b, 當然以你為上啦, 旅行等你大個左同你一齊去.
今日既節目係去鄧志昂健康院登記, 姑娘比左一大堆孕婦資料比我, 真係估唔到有咁多張傳單, 其實我覺得佢可以印本書好d.
我本來以為拿個日期就走得, 點知今日岩岩係產科新症, 咁就岩啦, 姑娘同我見面,抽血, 見醫生,
我有同佢地講我iui日期, 但佢地總是寫低我m日期來計, 計預產期早很多, 話我31/7, 我知無咁早,
但姑娘叫我要去贊育照下, 確實預產期, 其實佢地搵iui日期減2星期咪岩囉,
不過你叫我照下, 我見下小b當然好.

Dec 12, 2012 (5w1d):
唔該老公幫我去健康院拿番我本紀錄冊同贊育超聲波期,唐氏期, 結構期

Dec 13, 2012 (5w2d):

老公一早陪我去贊育照小b, 其實我係贊育出世架, 不過我之後都無去過, 依家去番出世既醫院, 都好開心.
可惜依家贊育只做檢查, 生產都是在瑪麗醫院啦, 我的小b多數會在瑪麗出世.

原來今日主要係同11w-14w既媽媽照唐氏, 我都聽到姑娘介紹呢個檢查, 而我係特別約照超聲波, 好彩好快到我.
入到去, 原來係照肚, 唔係陰超, 咁當然未照到小b啦, 有少少失望添.
姑娘用我iui日期計番個預產期10/8, 同延遲左我唐氏期, 結構期. 其實如果健康院咁計咪唔駛我白行囉.
老公笑說放假日日都係為小b

Dec 21, 2012 (6w3d):

從驗HCG之後, 等了2星期, 個心羅攣攣, 唔知小b係咪健康成長, 始終都要見到心跳才會放心.
呢段其間覺得個肚有時唔舒服, 又唔知係腸胃定小b問題, 好彩未有嘔吐同食唔落野, 只係間唔中覺得有點翳悶.
終於等到今日啦, 今次睇Dr Siu 係第一次產檢, 同之前照卵唔一樣,
每次都要驗尿, 磅重, 量血壓, 我真正覺得自己係一個大肚婆
醫生同我照陰超, 一照見到個大圈好似之前果d卵咁,
跟住醫生放大佢, 話我知出面係營養泡, 入面有胎囊, 再放大d就見到心跳, 其實我都唔係好睇得清楚閃閃,
之後醫生開心跳聲我聽....boom...boom....boom咁...我聽到真係有點感動, 可惜老公今日要返工無去到,
醫生話呢份係好好既冬至禮物
醫生比我預產期係13/8, 我信呢個多d,同我個apps一樣.