落雪情懷: 8月 2013

聽左好多講座, 知道餵母乳既好處, 其中既抗體係奶粉比唔到既, 就決定想餵母乳, 不過原來真係比想像中辛苦好多.
係醫院住左4日3夜, 我實在捱得好辛苦, 因為政府醫院係要媽媽自己照顧番bb, 我bb比較扭計, 一放低就大喊特喊.
每次一聽佢喊, 我就比母乳佢食就唔喊, 我差唔多每隔一個鐘就餵, 有時只係幾個字就餵, 每次起碼半個鐘至一個鐘, 但佢依然都係喊, 最大聲係佢, 姑娘都話佢係"大聲妹"!
我好怕嘈到其他媽媽和bb, 呢幾日我完全無得休息, 半夜都無得訓, 生完都無得休息真係好辛苦.
我知可能我未上奶, 佢可能食唔飽, 所以成日喊, 加上佢無安全感, 要抱住先覺得安心, 就算包到佢實一實都無用.
佢個咀仔又唔夠大, 咬到我損晒, 我真係累到好想補奶粉, 姑娘都好心教我點樣餵, 但奈何佢都依然係咁喊, 其他bb都唔會咁扭計既?
真係忍唔住要影低佢既喊包樣, 第二時比佢睇下

唉, 我捱左2晚無訓, 到第三晚, 我餵左佢成個鐘, 見佢訓著, 放低佢係床仔, 我去左廁所,
點知返到黎, 姑娘就抱住左佢, 話佢又係度大喊, 話我去咁耐應該推出去比佢地湊住先喎.
我當時真係崩潰了, 我岩岩先餵左成個鐘放低唔喊, 依家又係咁, 我又累又辛苦, 我真係無用, 終於係姑娘面前喊左出黎, 我話我已經2晚無訓過, 叫佢不如幫我補奶粉.
姑娘見我咁唔開心, 就話幫我湊住個b先, 等我休息下.
我終於有得訓下, 姑娘都有開解下我, 又用杯餵左好少奶粉佢食, 我終於可以訓幾個鐘, 之後再要繼續努力湊.
好記得果幾日我食午/晚醫院飯, 我要一手抱住佢, 一隻手食飯, 佢先會收聲.
醫生有時見到我唔係餵緊奶, 就係抱住佢, 佢話咁唔得喎, 叫我放低佢, 我夠想啦, 但一放低床仔又喊, 最怕嘈到人, 如果出左院, 就算喊都唔會嘈到其他人啦, 又有老公幫手抱下.
本來醫生想我住多2日, 因我血壓高入院, 但我生完血壓已經唔高, 我捱左呢3晚, 唔想再捱啦, 就要求出院啦, 我覺得我住多2晚真係會產後抑鬱啦!
影呢張相既時候, 真係抱住佢係我懷中, 佢先會訓得著, 其實佢一度訓, 我都好想一齊訓, 好累啦~~

終於到了出院既日子, 十分期待同老公和bb回家, 臨走前再驗bb, 只係少黃, 唔駛照燈, 我都安樂d, 我諗佢都有食到我d人奶.
出院前阿姐同我同bb影左張合照, 醫院仲送了一條披肩, 係鼓勵餵人奶既媽媽既, 真係好鼓勵到我, 我都係回家再睇下餵人奶佢係咪咁扭計先, 再決定啦, 希望我仲可以堅持到啦!

其實到今日, Aug 20, 回了家好好多, bb都唔太扭計, 可能醫院環境問題, 加上我當時未上奶, 佢先喊得咁厲害.
我依家係全泵媽, 泵出來可以知道佢食左幾多, 老公又可以幫手餵, 心情比起醫院時好好多, 見到bb食飽訓著就開心,
其實我都唔知自己可以堅持到幾時, 依家盡力啦, 餵到幾耐就幾耐啦, 至多都係餵奶粉o者, 又唔駛比咁大壓力自己既. 真係唔想攪到自己心情好差, 真係好佩服其他人奶媽, 大家加油啊!

回了家訓床仔, 無咁扭計啦, 安樂晒! 只係間中都有喊下, 扭食扭抱!

Aug 5, 2013:

又去贊育醫院照超聲波, 姑娘都係話胎水少, 不過又唔係太過份, 等明天瑪麗產檢聽聽醫生說是否要催生.
其實已經覺得個人好辛苦, 行幾步路都覺得好累, 尤其是下半身.

Aug 6, 2013: 真係無諗過, 今日就生得?? (有心理準備先好睇, 哈哈!)

今日係去瑪麗產檢的日子, 我一早6點幾就醒左, 因為個肚有少少痛, 我都唔知係平時假宮縮, 定係個肚唔舒服, 都去左幾次大大, 我估都無乜野.
今日媽咪陪我去產檢, 我地仲去茶餐廳食個早餐先, 先慢慢搭車去瑪麗, 因為約左12pm咁遲.

量血壓的時候, 我第一次上壓居然137, 要等20分鐘再量過, 第二次再量, 居然仲高, 係152! 我平時最多只係12x左右.
一路等, 其實個肚都間唔中有少少痛, 不過真係好輕微.
見醫生的時候, 醫生一見我血壓咁高, 就話要收我入院檢查下, 怕係妊娠毒血症之類, 加上我話有少少肚痛, 我完全無心理準備要入院, 咩都無帶喎.

Lunch都無得食, 就上左K9S產前房, 今次真係要換病人衫啦, 驗尿, 抽血, 度胎心機,
度完胎心機, 我問姑娘我究竟係咪陣痛, 佢話係非常初期既痛, 咁即係點? 即係係唔係?
醫生見下我, 話我如果血壓高, 加上胎水少, 為左我地安全, 等埋明天既驗血驗尿報告, 我又已經足月, 有可能會催生, 咁我諗住都要等明天報告先算啦.
攪到下午4點幾, 終於攪掂呢幾樣野, 落去同媽咪係醫院餐廳食左個下午茶, 其實果時痛得密左, 好似2,3個字左右痛一次, 但個樣仍然好似無乜點咁, 媽咪叫我同醫生講唔好出院住, 最好住到生啦, 我果時都未知幾時先生得, 仲諗醫生可能叫我明天就走.
果時m巾好似有少少血絲, 問姑娘話如果開始肚痛有少少血絲正常, 到真係見紅先好話佢知喎.

6pm探病時間, 我叫老公拿我個走佬袋來, 以防萬一, 終於都有拖鞋, 水杯啦, 無左呢d入院都唔方便, 仲叫老公買過床墊, 原來呢度指定要60x90cm, 本書又唔寫明?!
6-8pm 老公同媽咪係度, 其實我已經5分鐘左右一痛, 但都忍到, 唔想佢地太擔心, 其實心想唔知會唔會半夜就生得, 好想老公留低陪我, 唔想佢返左屋企再要出來趕唔切.
咁老公8pm走前幫我問過姑娘, 佢話我有排都未生得, 叫佢返去先喎.
到8點幾9點既時候, 我已經開始好痛, 我係床度典來典去, 問姑娘, 其實想佢話我知我會唔會已經開左度數, 會唔會半夜就生得, 但佢都無諗住同我度,
佢話, 你第一胎之嘛, 有排啦, 有d人痛完會返轉頭唔痛架! 叫我不如坐下fitball, 開得快d, 但其實果時我已經痛到唔想落床.
我問姑娘係咪入左產房先有得止痛? 有無人地掛係頸果d止痛機可以用? 佢話, 你依家咁快用, 遲d再痛點算, 叫我等多2,3個鐘先再問佢喎, 我真係比佢激死.

再到9點幾時, 好似2,3分鐘痛一次, 我有個計陣痛apps, 但已經無心機次次計啦, 姑娘又唔係附近, 我又費時比佢串, 就係張床繼續痛.
到10點左右, 阿姐同我量血壓, 佢見我咁痛,我又話好急大便, 好似真係要屙咁, 阿姐就幫我同姑娘講,
佢先話同我度開左幾多度, 要去另一張床, 咁我去一去廁所先, 先發覺, 見晒紅啦, 原來我一直唔知.
一度已經話我開左3度啦! 就拿拿臨執晒野, 話要入產房啦!
我即call老公來, 好怕佢趕唔切!
果時我已經好痛, 仲忍唔住係床度小便, 真係失禮晒, 姑娘用輪椅推我去產房.
入到產房, 只係好痛同好急既感覺, 其他乜都諗唔到, 只想老公快d來!
姑娘係產房, 一度話已經8度! 話我個水囊好低, 所以好痛好急咁.
好彩無幾耐話我老公已來到係出面, 我個心定少少!

老公入左黎, 果時應該11點幾, 個心定d, 但真係好痛, 次次都忍唔住想屙, 姑娘比笑氣我聞, 叫我一痛就大力吸, 其實我覺得只係幫到少少.
姑娘同我洗淨下體, 見到我條褲濕左, 仲以為我穿左水, 但我覺得唔係, 跟住唔知係咪姑娘同我穿水定我自己穿, 有一陣暖流既水流出黎咁, 應該係穿左水啦.
痛左幾次, 好彩姑娘叫我可以開始試下生, 我叫拉住手柄, 大大力咁屙, 我屙左幾次都未得, 果時真係超痛, 痛到難以形容,
淨係聽到話, 就得架啦, 見到頭架啦, 終於我大力咪埋眼屙左幾次, 終於生左啦!

姑娘們都無諗到咁快, 仲諗住要第二日8月7, 結果8月6日 23:57就生左啦!! 重2.87kgs, 即6.3磅重!
哈哈, 題外話, 奶奶後來都話好, 唔駛係農曆7月, 趕到6月尾!

見到bb, 個心有點激動, 仲比我地睇問係仔定女, 我答, 係女!
姑娘放bb係我肚上面, 叫老公剪臍帶呀!
但因為我仲係好痛, 隻腳仲開始好震, 個心都未定落黎, 只想快d完成其他野!
下面無剪到, 但有裂, 要聯針, 跟住唔知咩原因, 唔出胎盤住, 要聯針先,
先打麻醉針, 跟住好似聯左好多針, 不過呢d痛比起頭先生bb果種痛已經唔算係乜,
聯完再出胎盤, 唔駛點出力, 就拿了出來, 原來個胎盤係咁大既!
跟住bb沖完涼再比我地睇下, 喊得好大聲, 但我地好開心!