38w5d - Aug 6, 2013 BB出世了!

Aug 5, 2013: 

又去贊育醫院照超聲波, 姑娘都係話胎水少, 不過又唔係太過份, 等明天瑪麗產檢聽聽醫生說是否要催生.
其實已經覺得個人好辛苦, 行幾步路都覺得好累, 尤其是下半身.

Aug 6, 2013:  真係無諗過, 今日就生得?? (有心理準備先好睇, 哈哈!)

今日係去瑪麗產檢的日子, 我一早6點幾就醒左, 因為個肚有少少痛, 我都唔知係平時假宮縮, 定係個肚唔舒服, 都去左幾次大大, 我估都無乜野.
今日媽咪陪我去產檢, 我地仲去茶餐廳食個早餐先, 先慢慢搭車去瑪麗, 因為約左12pm咁遲.

量血壓的時候, 我第一次上壓居然137, 要等20分鐘再量過, 第二次再量, 居然仲高, 係152! 我平時最多只係12x左右.
一路等, 其實個肚都間唔中有少少痛, 不過真係好輕微.
見醫生的時候, 醫生一見我血壓咁高, 就話要收我入院檢查下, 怕係妊娠毒血症之類, 加上我話有少少肚痛, 我完全無心理準備要入院, 咩都無帶喎.

Lunch都無得食, 就上左K9S產前房, 今次真係要換病人衫啦, 驗尿, 抽血, 度胎心機,
度完胎心機, 我問姑娘我究竟係咪陣痛, 佢話係非常初期既痛, 咁即係點? 即係係唔係?
醫生見下我, 話我如果血壓高, 加上胎水少, 為左我地安全, 等埋明天既驗血驗尿報告, 我又已經足月, 有可能會催生, 咁我諗住都要等明天報告先算啦.
攪到下午4點幾, 終於攪掂呢幾樣野, 落去同媽咪係醫院餐廳食左個下午茶, 其實果時痛得密左, 好似2,3個字左右痛一次, 但個樣仍然好似無乜點咁, 媽咪叫我同醫生講唔好出院住, 最好住到生啦, 我果時都未知幾時先生得, 仲諗醫生可能叫我明天就走.
果時m巾好似有少少血絲, 問姑娘話如果開始肚痛有少少血絲正常, 到真係見紅先好話佢知喎.

6pm探病時間, 我叫老公拿我個走佬袋來, 以防萬一, 終於都有拖鞋, 水杯啦, 無左呢d入院都唔方便, 仲叫老公買過床墊, 原來呢度指定要60x90cm, 本書又唔寫明?!
6-8pm 老公同媽咪係度, 其實我已經5分鐘左右一痛, 但都忍到, 唔想佢地太擔心, 其實心想唔知會唔會半夜就生得, 好想老公留低陪我, 唔想佢返左屋企再要出來趕唔切.
咁老公8pm走前幫我問過姑娘, 佢話我有排都未生得, 叫佢返去先喎.
到8點幾9點既時候, 我已經開始好痛, 我係床度典來典去, 問姑娘, 其實想佢話我知我會唔會已經開左度數, 會唔會半夜就生得, 但佢都無諗住同我度,
佢話, 你第一胎之嘛, 有排啦, 有d人痛完會返轉頭唔痛架! 叫我不如坐下fitball, 開得快d, 但其實果時我已經痛到唔想落床.
我問姑娘係咪入左產房先有得止痛?   有無人地掛係頸果d止痛機可以用? 佢話, 你依家咁快用, 遲d再痛點算, 叫我等多2,3個鐘先再問佢喎, 我真係比佢激死.

再到9點幾時, 好似2,3分鐘痛一次, 我有個計陣痛apps, 但已經無心機次次計啦, 姑娘又唔係附近, 我又費時比佢串, 就係張床繼續痛.
到10點左右, 阿姐同我量血壓, 佢見我咁痛,我又話好急大便, 好似真係要屙咁, 阿姐就幫我同姑娘講,
佢先話同我度開左幾多度, 要去另一張床, 咁我去一去廁所先, 先發覺, 見晒紅啦, 原來我一直唔知.
一度已經話我開左3度啦! 就拿拿臨執晒野, 話要入產房啦!
我即call老公來, 好怕佢趕唔切!
果時我已經好痛, 仲忍唔住係床度小便, 真係失禮晒, 姑娘用輪椅推我去產房.
入到產房, 只係好痛同好急既感覺, 其他乜都諗唔到, 只想老公快d來!
姑娘係產房, 一度話已經8度! 話我個水囊好低, 所以好痛好急咁.
好彩無幾耐話我老公已來到係出面, 我個心定少少!

老公入左黎, 果時應該11點幾, 個心定d, 但真係好痛, 次次都忍唔住想屙, 姑娘比笑氣我聞, 叫我一痛就大力吸, 其實我覺得只係幫到少少.
姑娘同我洗淨下體, 見到我條褲濕左, 仲以為我穿左水, 但我覺得唔係, 跟住唔知係咪姑娘同我穿水定我自己穿, 有一陣暖流既水流出黎咁, 應該係穿左水啦.
痛左幾次, 好彩姑娘叫我可以開始試下生, 我叫拉住手柄, 大大力咁屙, 我屙左幾次都未得, 果時真係超痛, 痛到難以形容,
淨係聽到話, 就得架啦, 見到頭架啦, 終於我大力咪埋眼屙左幾次, 終於生左啦!
姑娘們都無諗到咁快, 仲諗住要第二日8月7, 結果8月6日 23:57就生左啦!! 重2.87kgs, 即6.3磅重!
哈哈, 題外話, 奶奶後來都話好, 唔駛係農曆7月, 趕到6月尾!

見到bb, 個心有點激動, 仲比我地睇問係仔定女, 我答, 係女!
姑娘放bb係我肚上面, 叫老公剪臍帶呀!
但因為我仲係好痛, 隻腳仲開始好震, 個心都未定落黎, 只想快d完成其他野!
下面無剪到, 但有裂, 要聯針, 跟住唔知咩原因, 唔出胎盤住, 要聯針先,
先打麻醉針, 跟住好似聯左好多針, 不過呢d痛比起頭先生bb果種痛已經唔算係乜,
聯完再出胎盤, 唔駛點出力, 就拿了出來, 原來個胎盤係咁大既!
跟住bb沖完涼再比我地睇下, 喊得好大聲, 但我地好開心!
老公仲話見到佢已經想食手指添!
係產房老公陪住我休息一個鐘, 我地傾下計, 個心平靜落黎, 之後姑娘比個bb我餵第一次母乳, 佢已經識係我身上啜啜啜, 好奇妙!
之後比人推去產後房K6S, 呢d係我地第一晚同bb影既相, 果時已經係凌晨3點左右, 老公仲幫我係7-11買左三文治同叮左蝦餃, 食左個人都溫暖d!
BB後來推來在我身邊, 但我未落得床, 只可輕輕拍下佢, 同叫姑娘比佢抱在我身邊比我餵奶.
我成晚都訓唔著, 諗番當時既情境同望住BB

後來諗番起, 個生產過程咁快, 阿b真係好錫我, 好好彩我無b鏈, 如果唔係打唔切針,
成個過程我只係用左笑氣, 其他止痛針, 無痛分娩都趕唔切, 原來我都幾捱得痛, 不過生完就舒服啦, 只係聯針位少少痛, 真係一生人難忘既經歷.