老公好好, 負責餵凌晨同早上果餐, 等我有得訓下, 老公返工後, 每日我一起身就泵奶, 煮野食, 餵奶, 又泵奶, 下午同b沖涼著衫, 又餵奶, 自己又煮野食, 泵奶, 洗樽, 有時洗衫晾衫, 又餵奶, 夜晚一時煮野一時買, 夜晚又餵奶, 其中好多次換片, 佢又成日喊要氹, 睡前又泵奶, 真係一日時間就咁過左, 但見到佢一日一日大, 又笑就好開心.
之前3個鐘餵一次奶, 現在已經可以4個鐘一次, 又戒左夜奶, 由夜晚12點幾時食完, 可以等到第二朝8點再食, 時間好似多番d. 雖然一餐奶都係要分2-3次先食晒, 但已經好好多.
我結果泵奶到3個多月, 之前一日泵4-5次, 現在一日只泵1-2次, 無就算了, 我覺得我捱左咁耐都算好犀利, 因為辛苦, 其實之前已經想放棄, 所以我覺得c琪媽真係好犀利呀! 加油呀!
欣欣b成日笑, 但喊起上黎真係唔簡單, 大聲都不得了, 有時明明食左奶, 換好片都喊到好大聲, 仲以為佢唔舒服, 探下熱又無事, 以為佢肚餓, 再開奶又唔食, 點知原來只係扭抱, 好多時係扭眼訓都狂喊, 要抱住佢拍佢訓先得, 好彩係一時時, 好多時比個奶咀就訓到, 無左個奶咀救星都唔知點算, 哈哈!
不過佢都算乖啦, 夜晚會好好訓, 唔會半夜三更喊, 已經好好啦, 我地有得訓!
我近來見到朋友滿月b仔, 佢成日訓, 唔多喊, 喊都細細聲, 原來欣欣b真係扭計d, 不過欣欣b都算笑得好多,係扭計b又係開心b!
3個月人仔, 手仔成日都會抓住一些東西, 餵奶就會捉住我隻手, 又成日抓頸上紗巾同自己件衫, 同公仔, 真係好得意.
近來仲發覺佢開始2手互握, 會研究下自己對手手!
呢張好似好斯文咁, 其實成日喊到拆天, 哈!
Halloween時應下節影相, 開始放隻手仔係咀邊想食, 但仲未放手指入去食, 希望佢唔食手指啦!
條頸已經有d力, 可以挨住坐一陣.
3個月唔只郁手手, 成日都踢腳打側身, 真係好好精力! 成日影到佢無影腳既相!
最後送上一張好好笑容既相!
