已經24w啦!

唔經唔覺已經24w啦! 時間真係話快唔快, 話慢唔慢!
仲有4個月就見到我的小bb啦!!
我只要佢健健康康就夠了!

講番之前, 每日睇住BK想生BB版, 又成日去睇醫生, 呢個bb真的得來不易, 好慶幸今日終於得到.
依家間中睇下BK, 見到人地都好似我以前咁努力緊, 有時我都會鼓勵下人, 答下問題幫下人, 希望個個都好快就成功!
我前2個月終於排到睇陳志慧醫生同董曉方醫生, 我都好想去睇一次,
因為我諗住如果生多個都可能要再打排卵針.
2個醫生比我既感覺都好好, 有耐心, 董醫生仲幫我照BB, 好細心,
我諗我下一胎會搵董醫生同我iui.

19w飲糖水:

因為董醫生都有提我多囊要留意糖尿, 要早飲糖水, 咁我就問健康院,
其實上次我都問過, 但姑娘話醫生無提過就唔駛,
今次我再問, 健康院醫生都好疑惑多囊同糖尿有咩關係? 我再三強調我生BB之前食糖尿藥控制血糖,
佢都無決定到比唔比我飲糖水,  只是去我去贊育覆診

跟住我去贊育第一次見醫生, 個女醫生雖然好似醫科學生, 但佢態度認真好多,
問得好清楚我多囊同食排卵藥打排卵針既情況, 健康院係無乜問過我,
跟住就叫我去瑪麗飲糖水.

飲糖水係星期六, 我老公都有陪我去, 之前一晚12點要禁食, 第二朝我地6點半就要起身, 真係辛苦, 因為約左8點半.
一早去到又眼訓又肚空空, 好彩早去拿到早籌唔駛等咁耐,
先抽血一次, 拿到糖水要十分鐘內飲晒, 杯糖水係暖既, 好甜但唔算難飲, 我就慢慢飲唔想嘔番出黎.
跟住就要等2個鐘, 好難捱. 果度有成百個媽媽都係飲糖水, 真係壯觀, 個個飲完有d訓下覺, 有d上下網, 真係好無奈.
老公買左個麵包, 我叫佢係一邊食好啦, 真係羨慕死人啦.
其實我本身都未必一定會食早餐既, 可能肚空又飲完杯糖水特別覺得肚餓.
終於捱完2個鐘再抽血就走得啦, 鬆晒, 終於可以食個午餐.
姑娘話有事會十日內通知, 之後我都無收到電話, 即係無事啦, 黎緊應該仲要飲多次常規既, 希望都過關啦!

21w照結構:

約左係贊育照結構, 第一個就有得照, 同唐氏一樣唔駛等, 真係好!
照之前都有叫小b聽聽話話比始娘照呀, 姑娘照時話佢將2隻手向後放係patpat 咁坐係度, 可能我去完廁所唔急所以佢坐係度喎, 真係得意,
點知照左頭仔口仔腳仔, 姑娘話佢位置唔係好岩, 未照到其他, 叫我出去等一陣再照,
咁我又出去又飲下水, 第二次入去照, 就照到條脊骨同埋腎, 但都仲未照到個心臟,
跟住又再出去等, 我就再叫佢聽聽話話啦, 第三次終於都照到個心臟啦, 無問題終於走得, 我都唔想再照第四次啦.
老公笑說佢貪靚要影多d相喎
不過照完好似有些部分細左1w, 有少少擔心

依家照完安心, 就開始要諗買bb野啦, 哈哈!
已經忍唔住買左好多粉紅色野啦, 相信你地都估到呢個係小公主!

有自己買, 有人地比的, 已經有咁多了
Hello Kitty衫, 本來咁大件唔想買住, 但只係咁岩街邊檔$15咋, 真係忍唔住買左先.