欣欣1歲留倩影

欣欣1歲時候, 我係團購買左優惠, 係影樓影左一輯相,
今次好叻叻呀, 笑住咁影,
上次五個月影時係一路喊, 要抱下佢先影到,
今次攝影師唱下ABC, 佢就笑得好開心.

佢有好多造型揀, 我就揀左Elmo, 雪人, 女巫, 我最滿意係影女巫, 顏色好, 欣欣又笑得好,
其實仲有好多造型都好得意, 可能遲d又再去影過, 哈哈!

欣欣1歲了!

真係人地覺得快, 自己覺得慢, 欣欣豬依家13個月啦!
咁多個月無update真係唔好意思, 日日都好似好唔得閒咁.

欣欣依家識扶住物件行, 但係放手自己行都未係好敢.
食野時間就成日要自己揸匙羹食, 當然食到亂七八糟啦.
我當然好開心佢比起以前有咁大既進步.
依家都無咁扭計豬啦, 見到陌生人仲會笑添.

 1歲著靚裙仔慶祝生日

   

 得閒落去公園行下

 小姐有馬車但唔願坐, 成日要起身行

食mummum要自己"畢"

又拆又食d地墊, 唯有買過一張過, 無得食, 哈哈

中秋節玩燈籠賞月!

好得意的寫真相!

係欣欣5個多月的時候, 同佢趕住影左呢輯寫真相, 有好多個得意背景可以選, 點解要趕住影? 因為係訓係度影, 識反身就唔影得架啦, 建議3-6個月去影.

果時欣欣已經好認人認環境, 影相時成日都喊, 攝影姐姐都無佢符, 影下佢又喊下, 我又抱下, 好彩影出來效果都唔錯 :P

岩岩係新年前影, 所以就應下節啦!

 

 我係草地上的小蜜蜂, 嗡嗡嗡~~

 

我係一個斯文既空姐 :)

 

 呢張可以做Poster呀, so cute :P

呢張好性感, 哈哈~

五個月和六個月的欣欣豬

欣欣依家已經六個半月了, 我先有時間寫番之前既事, 相就影了很多, 只是沒有閒心慢慢揀和寫blog呢, 希望大家唔好介意~

五個月的生日,特意影左呢張相, 因為在網上找到9位跟欣欣同是2013年8月6日生日的朋友仔, 大家組了個whatsapp group, 希望大家每個月6日都send一張bb相, 大家分享下.

 

五個月的欣欣, 腳仔靈活好多,  首先留意度佢會成日"拑"住人地隻手, 同成日"踤"2隻腳仔.

而手仔都好靈活, 隨手已經拿到附近的玩具自己玩.

床頭是在右邊的, 佢可以係床仔靠隻腳仔成個人轉圈, 有時見佢由打橫變左打直訓, 已經識逃出個防側睡枕, 真係好好笑.

佢終於會抓住吊起的玩具, 之前都唔識拿的.

呢個開心果成日都笑, 但係又成日都喊, 五個月起懂得認人, 別人抱就會喊, 只有爸爸媽媽抱或者要我地望住人地抱佢先收聲, 我地一方面開心佢咁痴我地, 但另一方面又覺得幾麻煩, 親朋戚友抱都未必得, 咁就真係行開一陣或者叫人湊下都唔得, 真痴纏, 哈~

 天氣凍既時候, 就成隻糉咁出街~

六個月的欣欣, 已經捉到自己隻腳仔玩 :)

我地發現佢好鐘意"搣"紙巾, 哈哈~

6個月開始食糊仔, 依家都食到半碗啦, 已經試過節瓜, 薯仔, 紅蘿白, 南瓜. 不過開始食糊仔就要飲多d水, 可是佢唔係好肯飲, 唯有逐少用匙餵佢飲,希望佢慢慢鐘意飲啦, 大家有咩好方法?

 

 欣欣既新年look, 恭喜發財, 希望大家身體健康! 心想事成!

 

食手指@四個月

四個月的欣欣表情多多, 好容易就會笑, 仲成日講野, 依依娥娥, 不過開始扭人抱, 有時放她在bb床上佢扭計, 要有人係側邊望住佢或者抱起佢先唔喊, 真係扭計豬, 老公笑說要放我地樣既稻草人先得.
呢d沖完涼影, 好鬼得意.

不過欣欣豬開始食手指啦, 洗白白除晒衫更加係食手指既好時機, 因為呢排著得多衫難食d. 真係醜死怪啦! 有無見過聖誕老人食手指架?!
依家見到佢食都盡量拿開佢同抹手, 但我諗都好難避免喇!

欣欣已經可以抬起頭, 但仲未識自己反身, 相信都快架啦, 依家會自己打側身.

之前一扭計就比奶咀佢, 攪得掂, 但佢依家居然識拿開個奶咀出黎玩, 跟住繼續喊, 哈哈, 真係好笑, 有時唯有比多條紗巾佢玩, 等佢唔好拿奶咀 :P

欣欣依家最鐘意玩既係床邊bird既搖鈴同呢本布書, 布書因為有響紙聲, 佢可以玩成個鐘都得架!